Basura mikatap human sa Sinulog parade

CEBU, Philippines - Mas daghang basura ang nakolekta sa mga kawani sa Department of Public Services (DPS) dinhi sa dakbayan sa Sugbo atol sa Sinulog Grand Parade kaniadto’ng Domingo.

Matud ni DPS chief Rolando Ardoza nga nakakolekta sila og mga 197 toneladas nga basura kun itandi 174 lang sa miaging tuig. Si Ardoza miingon nga wala’y kontrol ang mga tawo sa Sinulog sa paglabay sa ilang mga basura sa bisan asa nga dapit sa dakbayan. Human sa Sinulog Grand Parade kaniadto’ng Domingo nagpasad ang hilabihan kadaghan nga mga basura sa karsada nga giagian sa ruta sa Sinulog Grand Parade.

Nagmatuod kini nga hangtud karon dili pa diseplinado ang katawhan sa tukma nga paghipos sa mga sagbot.

Tambag ni Ardoza nga panahon unta sa kalihukan sa Sinulog hiposon lang sa katawhan ang ilang basura ug unya na ipagawas kun moagi na ang mga garbage truck.

Ang lagda nga gilatid sa Republic Act 9003 kon Ecological Solid Waste Management Act, nagdili sa paglabay og basura sa mga publiko’ng lugar sama sa dalan, sidewalks, esteros ug uban pa. Ang dakbayan hinuon napakyas pagpahiluna og daghang basurahan diha sa ruta nga giagian sa Sinulog Grand Parade sa miagi’ng Domingo.

Si Mayor Michael Rama nahinangop hinuon kaayo kay human g’yud sa Sinulog Grand Parade nakita niya nga ang mga kawani sa DPS nagtinabangay dayon sa pagsilhig sa mga sagbot nga nagkatag sa karsada.

Gani si Mayor Rama mimando ni City Administrator Lucelle Mercado nga hikayon ang mga dukomento aron ang mga kawani nga abtik kaayo nga nanglimpyo sa dakbayan kahatagan sa ilang pahalipay.

Sa nangagi’ng katuigan tagsa ka sako’ng bugas-humay ang gipanghatag sa mga kawani sa City Hall nga responsable sa pagpanglimpyo sa mga karsada sa dakbayan. (BANAT NEWS)