Pope Francis mobalik na sa Vatican

CEBU, Philippines – Sa kataposang homiliya ni Pope Francis human sa lima ka adlaw niyang State ug Apostolic visit masabtan nga sentro sa iyang mensahe mao ang kabililhon sa pamilya.

Panggaon ang pamilya

Matud pa niya, sama sa debosyon sa mga Filipino kang Senyor  Sto. Niño kinahanglang panalipdan kanunay ang pamilya. "[The Santo Nino] reminds us of the importance of protecting our families and those larger families, which are the Church, God's family, and the world, our human family," matud pa niya sa pinulongang English.

Walay kalainan ang iyang mensahe kagahapon sa iyang mensahe sa gihimong Santos nga Misa uban sa mga pamilya sa Mall of Asia. "Sadly, in our day, the family all too often needs to be protected against insidious attacks and programs contrary to all that we hold true and sacred, all that is most beautiful and noble in our culture," dugang pa sa Santo Papa.

Iyaha usab gipasidan-an ang katawhan ang yawa pirmeng mangita og paagi aron maguba ang pamilya sama sa pagkagapos sa tawo sa paggamit og gadgets, paglipaylipay sama sa pagsugal ug pag-inom. "Often, [the devil] hides his snares behind the appearance of sophistication, the allure of  being 'modern', 'like everyone else'. He distracts us with the promise of ephemeral pleasures, superficial pastimes," pasidaan pa niya.

Panalipdan ang kabataan

Giawhag usab ni Pope Francis ang kabataan atol sa pakigkita niya kanila diha sa University of Santo Tomas nga kinahanglang mopokus sila sa mas may kapuslanang mga butang o kadtong mga mahinungdanon.

Nanawagan usab siya sa tanan nga sama sa pagmahal sa katawhan kang Senyor Sto. Niño, kinahanglang panalipdan usab ang kabataan. "We need to see each child as a gift to be welcomed, cherished and protected. And we need to care for our young people, not allowing them to be robbed of hope and condemned to life on the streets," dugang pa niya.

Usa sa mga batang mihatag og testimonya mao ang 12-anyos nga kanhi street children kinsa nakahilak sa pagpangutana sa Santo Papa kun nganong gipasagdan sa Ginoo nga masakitan ang mga bata.

"Why is God allowing something like this to happen, even to innocent children? And why are there so few who are helping us?" matud pa sa bata. Mitubag niya dunay mga realidad sa kinabuhi nga makita lamang pinaagi sa mga mata nga nahugasan sa mga luha.

Giampo ang namatay

Sa laing bahin, mihalad og pag-ampo ang Santo Papa sa 27-anyos nga si Kristel Mae Padasas, church volunteer sa Catholic Relief Services nga aksidenteng natagakan ug namatay sa damba sa speakers sa gipahigayong Santos nga Misa sa Tacloban City.

Ang amahan sa dalaga nga si Paulino Padasas Jr. sumala pa sa Instagram post ni GMA reporter Aubrey Carampel, miadto sa Apostolic Nunciature  aron makigkita kang Pope Francis. Matud pa nga gigakos kini sa Santo Papa ug gihatagan og rosaryohan.

Nasayran nga usa ka OFW ang inahan ni Kristel ug mopauli na kini gikan sa Hong Kong, si Kristel lamang ang solo nga anak sa duha. Ang amahan ni Kristel miingon nga may kapuslanan ang pagkamatay sa iyang anak.

Nagpasalamat

Samtang si Manila Archbishop Luis Antonio Cardinal Tagle misaad kang Pope Francis nga kuyogan kini sa mga Filipino sa pagpakatap sa kahayag ni Hesus sa mga hilit nga dapit.

Gipasalamatan usab niya si Francis sa paghatag niini og panahon pagduaw sa Pilipinas ug pagpaabot sa mensahe sa Ginoo.

Sumala pa ni Metro Manila Development Authority chairman Francis Tolentino miabot og unom ka milyon ka tawo ang nanambong sa kataposang Santos nga Misa nga gihimo sa Santo Papa diha sa Quirino Grandstand sa Luneta Park. Tungod niini,   mao na kini ang bag-ong world record nga dunay labing daghang tawong misaksi sa kalihokan sa Santo Papa. (Gikan sa Wires/EIM) (BANAT NEWS)