Namusil, gikulata patay

CEBU, Philippines – Namatay gumikan sa kulata ang usa ka lalaki nga unang namusil sa diskohan nga nakaangol og tulo ka tawo nga naglakip sa usa ka barangay tanod sa Sitio Dubdob, Barangay Bogo, lungsod sa Argao sa niaging kadlawon.

Ang namatay mao si Dario Otom, hingkod ug taga Mantalongon, lungsod sa Dalaguete.

Ang mga naangol sa pagpamusil ni Otom mao sila si Bryan Sarona, 34, barangay tanod nga kritikal ang kahimtang; Romano Mier, 47; Elvin Palma, 19, nga pareho’ng nagpuyo sa mao’ng barangay.

Matud ni PO2 Paulino Sanchez Jr., desk officer sa Argao Police, nga nagsaulog sa fiesta ang maong barangay hinungdan nga dunay disco. Sumala pa ni Sanchez nga alas 2:40 sa kadlawon dihang nalingaw og sinadsaray ang mga tawo sa diskohan kalit lang niabot si Otom ug nagpasalba sa dala nga armas sulod sa diskohan.

Ang barangay tanod nga si Sarona nga duty niadto’ng panahona ang niduol sa suspek ug nibadlong apan gipusil na hinuon igo sa iyang kilid.

Wala pa matagbaw si Otom namusil pa kini sa mga tawo nga gikaangol ni Mier ug Palma nga nakaangkon og samad sa tiil ug kamot.

Sigun pa ni Sanchez nga naundang lang sa pagpamusil ang suspek dihang nahutdan sa bala ug sa kalagot sa mga tawo gitabangan kini og kulata hangtud namatay.

“Pwerte’ng gubaa sa nawong sir oy, mura’g na-deformed, ulo ang grabe’ng damage,” matud ni Sanchez.

Wala pa sab masayud ang kapolisan kung hubog, naghuramentado ba ang suspek o duna ba’y kontra sa lugar.

Gipaabot sa kapolisan nga makuha na sa pamilya ang patay nga lawas sa suspek aron ilang makuhaan og impormasyon.

Sa pagsubay sa kapolisan sa crime scene wala nila nakita ang armas nga gigamit sa suspek. Gitug-an ni Sanchez nga wala sab sila’y nasikop sa mga nikulata kang Otom human wala’y nitug-an gumikan sab sa kadaghan sa mga tawo sa lugar atol sa hitabo. – /GMR) (BANAT NEWS)