Nanghilabot sa manok gibuk-an sa ulo

CEBU, Philippines – Gibuk-an sa ulo ang maguwang lalaki gumikan sa kalagot sa manghud nga gikuha ang iyang manok igtatari sa Sitio Sto. Niño, Tabok Lamac, Yati, lungsod sa Liloan niadto’ng nakalabay nga udto.

Ang biktima naila nga si Aurellio Tejarasco, 60, minyo, samtang ang suspek ang iyang half-brother ug manghud nga si Placido Quilme, 58, ulitawo.

Sumala pa ni PO3 Jason Gayo, desk officer sa Liloan Police, nga dead on the spot si Tejarasco human gipusil sa likod sa iyang ulo gamit ang .357 revolver. Sa imbestigasyon sa Liloan Police nasayran nga una na nga nibahad si Tejarasco sa iyang manghud nga iyang kuhaon ang manok kung dili niya itari.

“Taud-taud na daw to’ng bahad sa magulang nga basta lagi daw og dili niya itari, iyang kuhaon ang manok,” sumala pa ni Gayo.

Niadtong nakalabay nga adlaw nabantayan ni Quilme nga wala na ang iyang hiniktan ug sa iyang kalagot ug pagduda nga gikuha sa iyang maguwang, dali nga nikuha sa iyang revolver ug gipangita ang biktima. Tayming nga naghapyod-hapyod si Tejarasco sa hiniktan nga manok nga nagtalikod ug dayon gibuk-an sa ulo sa iyang manghud.

“Manok ra gyu’y naka-ingon sa patay,” dugang ni Gayo.

Ang suspek boluntaryo nga nitahan sa mga polis dihang giadto sa ilang panimalay ug nakuha ang .357 revolver ni Quilme nga duna’y lima ka bala ug usa ka basiyo. Gipaabot sa kapolisan kung mopasaka ba og kaso ang pamilya sa namatay niya nga maguwang. – /GMR) (BANAT NEWS)