1.5M nagsinulog

CEBU, Philippines – Nahimong hapsay ang pagsaulog sa Sinulog grand parade 2015 kagahapong adlawa dinhi sa dakbayan sa Sugbo nga gitambongan kapin usa ka milyon ka mga dumuduong ug mga debotos, human nga miduyog sab ang kahimtang sa panahon.

Kini ang gitug-an ni Cebu City Police Office Officer-in-Charge Chief, Sr. Supt. Conrad Capa nga nahinabi sa mga tigbalita.

Matud pa ni Capa nga sa nakuha niya nga impormasyon ug paglibot-libot dinhi sa dakbayan wala’y natala nga mga dagkung hitabo ang mga presinto sa kapulisan ilabina sa mga presinto nga giagian sa rota sa Sinulog Grand Parade.

Buntag pa lang ug  hangtod pagkagabii gipangunayan ni Capa ang paglibot sa dakbayan ilabina sa mga lugar nga duna’y baga nga duot sa mga tawo aron pagsubay sa seguridad sa mga polis nga nadestino sa maong dapit

Si Capa miingon nga ilaha ra ‘sab nga gipatuman ang “maximum tolerance” ngadto na sa mga tawo ilabina  sa mga lugar dili angay agi-an sa mga tawo.

Samtang ang Operations Chief sa Cebu City Traffic Operations Management (CITOM) Joy Tumulak miingon nga sa ilang pagbanabana sa gidaghanon sa mga tawo alas- 4 sa hapon, miabot kini og 800 ka libo, apan pagkagabii misaka kini ngadto sa 1.5 ka milyon ka mga tawo.

Kung itandi sa nanglabay nga selebrasyon mikunhod ang gidaghanon sa mga tawo nga mitambong sa Sinulog karon ug ang hinungdan nga nakita ni Tumulak mao ang kadaghan sa mga tawong nangadto sa Tacloban City aron pagsimba kauban si Pope Francis.

Nasayran nga daghan ang nangatanggong   gumikan sa bagyong Amang. Usa ‘sab   posibling hinungdan nga daghan sab sa mga tawo ang gipili na lang nga sa balay na magpundo ug mitan-aw na lang sa telebisyon sa wali sa Santo Papa ug sa kalihokan sa Sinulog.

Sa pagsubay sa Banat News, dunay natalang na-missing nga bata nga gipahiluna karon sa Pari-an Police Station , hinuon nakuha ra ‘sab kini pagbalik.

Samtang ang Fuente Police nakatala og lima ka mga bata nga nawala, tulo ang naa sa kostudiya sa kapulisan ug duha ang padayon pa nga gipangita atol ning pagbalita.

Ang Theft and Robbery Section (TRS) sa Cebu City Police Office pinaagi sa hepe sa maong buhatan Chief Inspector David Señor miingon nga wala sila’y natala nga dagkong panghitabo ma’y labot na sa pagsaulog sa Sinulog.

Una na ‘sab nga gitug-an sa hepe sa Police Community Relations (PCR) sa CCPO nga Chief Inspector Enrique Belciña nga dili mopahawa ang mga polis sa mga lugar kung asa sila nadestino hangtod nga dili mahuman ang kasaulogan sa Sinulog.

Gipasabot ni Belciña nga bisan pa og mahuman na ang grand parade ug kalihokan sulod sa Cebu City Sports Complex anaa gihapon ang mga polis sa palibot sa dakbayan sa Sugbo aron bantayan ang palibot ilabina sa mga tawo nga naglingawlingaw og inom  daplin sa dalan nga gidili dinhi sa siyudad.

Si Cebu City Mayor Michael Rama nagkanayon nga halos tanan nga hotel sa dakbayan sa Sugbo ug Lapu-Lapu fully- booked  subay sa iyang pagduaw.

Dugang pa ni Rama nga malinawon ang Sinulog karon bisan pa man kun adunay gamay nga problema sa Crowd Control tungod sa kadaghan sa mga tawo nga misalmot aron pagtan-aw sa Sinulog wala kaayo ingon dako nga problema. – /EIM) (BANAT NEWS)