Fluvial malampuson
CEBU, Philippines – Malampuson ug hapsay nga natigayon ang fluvial procession kagahapon sa buntag matud pa sa kapolisan bisan pa man dunay taliabot nga bagyong Amang.
Ang Deputy Regional Director for Operation sa Police Regional Office 7 ug officer-in-charge sa Cebu City Police Office Senior Superintendent Conrad Capa miingon nga wala’y nasugatang problema ang kapolisan kagahapon atol sa fluvial procession.
Pasado alas 6:00 nakasugod og irog ang galleon gikan sa Ouano Wharf apan nadelatar og 30-minutos.
Bisan pa sa pagdili pagpalupad og balloons dunay mga debotos nga nagpalupad niini ug daghan usab ang nagpabuto og mga firecracker sa baybayon.
Ang galleon giluwanan ni Fr. Jonas Mejares, ang rector sa Basilica Minore del Sto. Niño kauban sa Hermano ug Hermana Mayor karong tuiga nga sila si Dr. Jose Enrique de las Peñas ug Dra. Jill de las Peñas.
Miabat og 106 ka mga sakyanan sa dagat ang nanguyog. Gisundan kini sa reenactment sa Unang Bunyag, Unang Misa ug pagtukod sa Kristiyanismo.
“Pasalamat pa rin tayo sa Panginoon kahit na signal number 1 tayo dito, still maganda naman yung condition ng karagatan at medyo mahina lang ang hangin na na-experience natin,” matud pa ni Philippine Coast Guard Cebu station commander Rodolfo Villajuan.
Apan usa ka bomb scare ang na-report pipila ka minutos human sa fluvial procession kagahapon sa buntag.
Matud pa ni Inspector Ador Rusiana, officer-in-charge sa Cebu Port Police intelligence and investigation section, nga negatibo ang maong hulga. Botelyang dunay grasa og straw nga giporma og antena ang sud niini nga gibitay sa bintana sa buhatan sa Port Police. (BANAT NEWS)
- Latest
