10 mil nag-atang sa traslacion

CEBU, Philippines - Liboan ka deboto ang nihangop sa imahen sa balaang bata nga si Senior Santo Niño ug Birhen sa Guadalupe atol sa Traslacion kon ang pagbalhin gikan sa Basilica Minore del Santo Niño ngadto sa St. Joseph National Shrine sa dakbayan sa Mandaue.

Ang kalihukan gisugdan pinaagi sa Walk with Mary diin gikuha pinaagi sa usa ka prosesyon ang Birhen sa Guadalupe sa simbahan niini sa barangay Guadalupe dakbayan sa Sugbo ug gidala sa Basilica.

Si Rev. Msgr. Jose Montecillo ang nangulo sa Santos nga Misa sa Basilica nga gisundan sa Traslacion. Si Cebu City Mayor Michael Rama ang nitugyan sa imahen ngadto kang Mandaue City Mayor Jonas Cortes kauban sa kaparian paghiabot sa utlanan sa Mabolo ug Subangdaku.

Ang Tribu Mandauehanon sa Opao Elementary School nga maoy ikaduhang mananaug sa Sinulog sa Kabataan sa Lalawigan 2015 ang nihalad og sayaw sa paghangop niini.

Si Senior Inspector Jimmy Portes, hepe sa Station 1 sa Mandaue City Police Office (MCPO), nibanabana nga 10 mil ang gidaghanon sa mga deboto nga naglumbay sa kadalanan nga nagpaabot paglabay sa imehan.

Human napahimutang ang mga imahen sa simbahan sa Mandaue, gisundan dayun sa Santos nga Misa nga gipangulohan ni Fr. Benjamin Cortes.

Ang imahen gibilaran kagabii hangtud karong buntag alang sa fluvial procession balik sa dakbayan sa Sugbo.

Higpit nga gibantayan sa 300 ka polis, kadete sa Reserve Officer Training Corps (ROTC) ang mga imahen sulod sa St. Joseph National Shrine.

Si Senior Inspector Allan Cuizon, deputy chief for operation ug public information officer (PIO) sa MCPO, miingon nga ang ilang pagbantay hangtud na sa pagpahigayun sa foot procession subay sa dalan Catalino U. Ouano ug dalan Plaridel sa barangay Looc lahos na sa Ouano Wharf. (Romeo T. Limpangog, Decemay P. Padilla ug USJ-R Masscom Intern Sheriza Mae Ramirez Uy/GMR)(BANAT NEWS)