Pope Francis, Amang gipangandaman, mga pasahero na-stranded
CEBU, Philippines - Preparado na ug gialerto na ang Provincial Disaster Risk Reduction and Management Council (PDRRMC) sa pagsulod sa Bagyong Amang ug ingon man sa posibilidad sa paghapit sa Santo Papa dinhi sa Sugbo.
Matud ni Baltazar Tribulano Jr., hepe sa Task Force Paglig-on nga ilang gi-monitor karon ang dagan sa bagyong Amang nga posibleng mabatyagan sa amihanang bahin sa Sugbo.
"We raised our preparation into Alpha which means we are still on the observation stage but dili g’yud gihapon ‘ta mokompiyansa mao na’ng we are on standby for 24/7 hangtud mahuman ang bagyo," asoy ni Tribulano
Dugang niya nga ang search and rescue team usab naka-standby kung adunay kalit nga kakulian lakip na ang mga relief packs ug pagpakatap sa impormasyon sa katawhan.
Ang PDRRMC nakig-alayon na usab sa Armed Forces of the Philippines (AFP) ug Office of Civil Defense sa posibilidad sa paghapit sa Santo Papa.
"Kung unsa mi ka preparado sa bagyong Amang the same ra pud sa posibilidad nga ma-divert ang flight ni Pope Francis tungod sa bagyo mao nang full alert kaayo ‘ta karon," nagkanayon si Tribulano.
Sa laing bahin, 170 ka delegado gikan sa Archdiocese of Tagbilaran alang sa Papal visit nga gikatakda untang mobiyahe padung sa Tacloban City via Ormoc City ang na-stranded sa Sugbo tungod sa pagkanselar sa biyahe ngadto sa Eastern Visayas ug Samar.
Naproblema sila kagahapon kung makaabot ba sila sa ilang destinasyon o dili ug usa sa ilang giproblemahan mao ang katulgan kagabii tungod kay fully-booked na ang tanang hotels ug pension houses sa Cebu City.
Atol ning pagsulat sa balita, onse na ka biyahe gikan sa Cebu ug Bohol padung sa Palompon ug Ormoc ang nakanselar hinungdan nga dunay 300 ka pasaherong nangatanggong.
Daan nang mipahibalo si Philippine Coast Guard Central Visayas chief of staff, Commander Weniel Azcuna nga posibleng modaghan pa ang biyaheng kanselahon samtang nagkaduol ang bagyo. (Lorelyn D. Dechos, USJ-R Intern ug report sa The Freeman/EIM)(BANAT NEWS)
- Latest
