1 patay, P3.5M shabu ‘sakmit

CEBU, Philippines - Usa ang patay ug upat ang nasikop atol sa gilusad nga buy-bust operation sa hiniusang tropa sa Regional Anti-Illegal Drugs Special Operations Task Force (RAIDSOTF-7) ug Provincial Intelligence Branch (PIB) sa Cebu Provincial Police Office diha sa Green Lagoon lungsod sa Compostela.

Ang namatay naila nga si Jose Cuizon,nagpuyo sa maong lugar, samtang ang upat ka mga nasikop naila nga sila si Jerry Peregrino, Marie Jun Tampus, Roel Bautista ug Raymond Cuizon paryente sa namatay.

Matud pa ni Senior Inspector Henrix Bancoleta, team leader sa RAIDSOTF-7, duha ka semana nila nga gipaubos sa surveillance si Jose Cuizon human nila nadawat ang impormasyon nga namaligya kini og drugas.

Gihulagway ni Bancoleta nga usa ka level 2 drug pusher ang suspetsado nga makabaligya og dul-an usa ka kilo nga drugas matag semana ang mabaligya niini.

Ang mga awtoridad mipalit kaniya og bali og P10,000 nga shabu gamit ang budol money, apan sa paghamag na sa mga polis nakasibat si Jose ug nakasakay og motor hinungdan nga ang nangadakpan mao ang upat.

Daling gigukod si Jose ug naapsan sa Tuburan Sur, dakbayan sa Danao apan gikatahong nakigpinusilay kini hinungdan nga napusilan usab sa mga polis. Dali pa unta nga gidala sa tambalanan si Jose apan nakabsan kini sa iyang kinabuhi.

Nakuha sa kapulisan ang usa ka .45 caliber pistol nga duna’y pito ka mga bala.

Gipasabot ni Bancoleta nga sa ilang nakuha nga impormasyon naggikan sa Muntinlupa ang supply sa drugas sa suspetsado.

Atol sa buy-bust operation nasakmit sa kapulisan ang usa ka daku ka bulto sa gituohang shabu, tulo ka medium size nga mitimbang og 300 gramos ug mikantidad og P3.5 milyones.

Samtang nasikop ang usa ka  Chinchona Rico, 31, diha sa Barangay Matab-ang dakbayan sa Toledo atol sa buy-bust operation sa mga sakop sa Toledo City police.

Nakuha gikan ni Rico ang P500 buy-bust money ug 10 ka mga gagmay nga putos nga gituohang shabu.

Atol sa pagronda, laing tulo ang nasikop nga giila nga sila si  Franz Sabido, 19, Renzki Rico, 18, ug Gradz Mahilum, 34, nga giingong nagsuyop atol sa pag-abot sa mga polis. (Jojo C. Ugdol ug Raymond Abarcas/EIM)(BANAT NEWS)