Tungod sa iring, babaye nadasmagan patay

CEBU, Philippines - Iring itom nga nitabok sa karsada ang gitumbok nga hinungdan sa drayber sa usa ka motorsiklo nga iya’ng nabanggaan patay ang 65-anyos nga babaye sa barangay Bahay, lungsod sa Sibonga, pasado alas 6 sa hapon sa nakalabay nga adlaw.

Ang biktima naila nga si Felipa Maravillas, minyo ug nagpuyo sa maong lugar samtang ang drayber sa motorsiklo giila nga si Christan Estrada, 29, ulitawo, taga lungsod sa Barili ug nagtrabaho sa dakbayan sa Carcar.

Matud ni PO2 Ederlino Bacusmo, imbestigador sa Sibonga Police Station, nga gikan sa lungsod sa Dalaguete si Estrada ug paingon sa dakbayan sa Carcar samtang ang biktima paingon na unta mopauli human nikuha sa iyang bahin sa naani nga mais.

Ang mga tawo sa lugar una’ng nagtuo nga nabiktima sa hit and run si Maravillas nga ila una’ng gitabang apan sa ilang pagsubay ila nabantayan ang drayber sa motorsiklo nga didto napasok sa bakhawan daplin sa karsada.

Gidala sa Carcar District Hospital ang biktima apan nakabsan gyud sa iyang kinabuhi samtang ang drayber nalandig sa Vicente Sotto Memorial Medical Center (VSMMC) gumikan sa naangkon nga mga pangos ug bun-og sa kalawasan.

“Posible’ng pasangil ra to niya, maayo unta og nakakita gyud ta sa iring itom, wala man. Kay kung ako ato, ako na lang ligsan ang iring kay sa tawo ka mabangga,” matud ni Bacusmo. Wala pa’y kaso nga gipasaka batok sa drayber samtang andam motabang sa tanan nga gastohanan ang kompanya nga gialagaran ni Estrada.  (BANAT NEWS)