Bugaw sikop, 6 ka babaye naluwas
CEBU, Philippines - Gisikop sa Regional Anti-Human Trafficking Task Force-7 ang duha ka gidudaha’ng bugaw samtang upat ka babaye ang naluwas atol sa entrapment operation sa usa ka kan-anan sa dakbayan sa Mandaue niadtong nakalabay nga gabii.
Ang nadakpan mao sila si alyas Grace, 26, ug alyas Mylene, 33, pulos minyo nga taga sitio Laray, Pitogo, Consolacion.
Matud ni Insp. Sheryl Bautista, ang team leader sa RAHTTF-7, nga halos duha ka semana ilang gipaubos sa surveillance ang mga suspek.
Ang asset sa kapolisan ang una’ng nakignegosasyon ni Grace nga una’ng nipasalig nga mohatag og mga estudyante sa high school ug may dala na kini’ng duha ka babaye.
Nikontak pa si Grace kang Mylene nga maoy nidala og laing upat ka babaye nga naglakip sa usa ka minor de edad.
Sa dihang nag-abot na sa lugar ang mga bugaw ug mga babaye dali sila’ng gisikop sa kapolisan ug naluwas ang unom ka babaye. Hugot nga gihimakak sa mga suspek ang pasangil.
Matud ni Grace nga igo lang kini naabot sa maong lugar human gikontak sa iyang kostumer aron magpamasahe ug si Chona igo lang daw niadto sa lugar aron mangaon kauban ang iyang pag-umangkon.
Sumala pa ni Bautista nga tag P4,000 hangtud P5,000 ang bayad sa mga batan-ong babaye ilabi na kung kini usa ka minor apan kung hingkod na ang edad anaa sa P2,500 ang bayad.
Matud ni Bautista nga duha hangtud tulo ka tuig na nga nihimo sa ilegal nga trabaho ang duha ka bugaw kinsa mag-atubang og kaso’ng human trafficking. (BANAT NEWS)
- Latest
