Opao Elem. School dako ang pasalamat sa Senyor Sto. Niño

CEBU, Philippines – Mipasalamat ngadto kang Senyor Sto. Niño ang mga tinun-an ug mga magtutudlo sa Opao Elementary School human sa naangkon nila nga mga  pasidungog sa Sinulog sa Kabataan sa Lalawigan karong tuiga.

Si Dr. Virginia  Zapanta nga maoy Mandaue City School Division Superintendent sa Department of Education (DepEd) dihang nahinabi sa Banat News miingon nga dako kaayo kining dungog alang sa Mandaue ug dako nilang pasalamat sa gihatag nga kadaogan kanila.

Gipasalamatan usab ni Zapanta ang mga magtutudlo sa Opao Elementary School uban sa 100 ka mga bata  ug sa mga ginikanan nga misuporta sa ilang contingents.

Si. Alma Bardoquillo nga maoy school principal sa Opao Elementary School sa  Barangay Opao, Dakbayan sa Mandaue nga nahinabi sa Banat News miingon nga wala gayod sila magpaabot nga makuha nila ang lima ka tropeyo  tungod kay ang paghalad lamang gayod ngadto sa Senyor Sto. Niño ang ilang tinguha sa ilang pagsalmot.

Dihang gipakanaug na sa mga hurado ang ilang hukom  dako na lamang ang ilang kahingangha nga gawas nga sila ang nahimong ikaduhang mananaug ug nadawat nila ang P150 mil nga ganting salapi, sila pa gayod ang nakakuha  upat ka mga special awards niini.

Naglakip na special awards nga ilang naangkon mao ang best in costume, best in musicality, best in street dancing ug ilang nadawat ang P50 mil nga ganti sa matag usa niini.

Samtang ang ilang choreographer nga si Ervin Demapi mao usab ang nahimong best choreographer nga nakadawat usab og P15 mil nga ganti.

Matud pa ni Demapi  nga nagsugod sila sa ilang pagpraktis niadtong bulan lang  sa Oktubre  sa miaging tuig ug ang iyang gihimo mao lamang g’yud ang pagpaningkamot sa tuyo nga makahalad usab og sayaw sa Sinulog sa karong tuiga. – /EIM) (BANAT NEWS)