Bagyo’ng amang moabot sa sabado

CEBU, Philippines – Makasulod Philippine Area of Responsibility (PAR) ang unang bagyo nga moigo sa nasud karong tuiga nga gibanabana’ng maatol sa fluvial procession sa Sabado ug hangtud na sa Sinulog grand parade sa Domingo.

Si Engr. Oscar Tabada, regional director sa Philippine Atmospheric  Geophysical and Astronomical Services Administration (PAGASA)-Visayas, miingon nga ang bagyo’ng Amang ilang gibanabana nga magdala og labing kusog nga paghuros sa  hangin nga 60 kilometros sa matag oras.

Magdala kini og labing daghan nga uwan nga maoy makaingon sa mga pagbaha o pagdahili pa sa yuta sa mga dapit nga maoy maigo sa unang bagyo nga mosulod sa nasud.

Gipaneguro hinuon ni Tabada nga base sa ilang monitoring nga gihimo ang maong bagyo adto mosentro sa Luzon area ug apil na ang Tacloban nga maoy mga dapit nga duawon ni Pope Francis.

Dugang pa ni Tabada dili kaayo kabalak-an ang mga kalihukan sa kapistahan ni Senior Sto. Niño sa dakbayan sa Sugbo kay may mga oras nga makasinati og pag-uwan apan dili gyud sama kakusog sa mga dapit dinhi sa nasud nga maoy masentro sa pag-igo sa bagyong Amang.

Matud ni Tabada nga sa pagpahigayun sa fluvial procession masinati ang pag-uwan apan sa adlaw sa Sinulog Festival masinati na ang maayong panahon.

Ang bagyong Amang molungtad hangtud sa Enero 19 nga mao usab ang adlaw nga gikatakda sa pagbiya ni Pope Francis sa nasud. – /GMR) (BANAT NEWS)