Lalaki nang-holdup sikop
CEBU, Philippines – Nasikop sa kapolisan ang 25-anyos nga lalaki nga padulong unta sibat gikan nanghold-up sa dalan N. Bacalso eskina V. Aranas, Duljo Fatima, dakbayan sa Sugbo niadtong Domingo sa gabii.
Ang suspek nailhan nga si Jhosua Guzman, taga Ybañez Compound, barangay Mambaling.
Matud sa biktima nga si Manessa Scarlet Calang, 21, residente sa dalan Urgello, barangay Sambag-1, nga samtang siya nagsakay sa pasaheroan padulong pauli, kalit siyang gitionan og kutsilyo sa suspek ug gibira ang iyang sling bag dayung dagan.
Si SPO3 Federick Eslit kinsa usa sa mga nisikop sa suspek miingon nga samtang nagpahuway siya sa iyang panimalay sa barangay Duljo Fatima, ang suspek nagdagan ug bitbit ang usa ka shoulder bag.
Sa luyo niini, adunay babaye nga naggukod ug nagsiyagit nga adunay tulisan.
Daling gigukod ni Eslit ang suspek ug human naapsan sa dili mominos 200 metros nga gilay-on.
Sa tabang sa kabatan-onan sa lugar ug ni PO1 Mike Cabaral kinsa naglakaw padulong sa iyang duty, nasikop ang suspek ug nabawi ang sling bag nga adunay sulod cellphone, usa ka tablet nga mobalor og P10 mil ug kwartang nagkantidad og P1,400.
Kasamtangang gitanggong ang suspek sa Mambaling Police Station. – /GMR) (BANAT NEWS)
- Latest
