Drivers nabalaka sa pag-usab sa rota

CEBU, Philippines - Nabalaka ang liboan ka traysikol drayber sa dakbayan sa Mandaue nga makahatag gyud og daku’ng epekto sa ilang panginabuhi ang pagdili kanila nga makapamasahero sa mga national roads.

Si Lauro  Panuncial, 49-anyos, taga barangay Maguikay, miingon nga ang mga operator sa traysikol nga kwartahan dali lang makatakli sa ilang panginabuhi pinaagi sa pagpalit og multicab nga himuong pasaheroan. Dugang ni Panuncial nga ang mga sudlonon nga mga dalan sa dakbayan anaa na daan ang mga traysikad ug mag-ilog na sila og pasahero kun magpadayun ang mga traysikad nga kasamtangan karong nagbiyahe sa mga hilit nga lugar sa kabarangayan.

Nagdasok sab ang mga habal-habal nga kasamtangang nagbiyahe sa bukirang bahin sa dakbayan nga gikabalak-an nga manggawas sa paghatud og pasahero kay wala malakip sa pagdili sa pagdagan sa mga national road.

Si Joebert “Bong” Nemenzo, chairman sa National Confederation of Tricycle Operators and Drivers Association (NACTODAP), miingon nga iyang awhagon ang opisyal sa ilang pederasyon sa pagtambong sa public hearing karong Martes.

Si Edwin Ermac, executive officer sa Traffic Enforcement Agency of Mandaue (TEAM), makigtagbo sa mga drivers ug operators sa multicabs alang sa pagtuki sa kausaban sa rota. Gipasabot ni Ermac nga kinahanglan gyud nga ilang himuon tungod kay mao man kini ang gipahimangno kanila sa Department of Public Works and Highways nga ang traysikol dili gyud makadagan sa mga national highways. (BANAT NEWS)