Pag-ayo sa kadalanan ipadali

CEBU, Philippines - Gimandoan ni Gobernador Hilario Davide III ang buhatan sa Provincial Engineer nga ipadali ang pag-ayo sa mga agianan nga gipanag-iya sa probinsya nga naguba atol sa bagyong Seniang.

Sugdan na sa Kapitolyo ang pag-ayo sa mga provincial roads sa lungsod sa Alcantara ug Barili.

Nagpadala na ang Kapitolyo og mga dagkung ekipo sa Alcantara niadtong Enero 6. Matud ni Mayor Beatriz Caburnay sa Alcantara nga tanang agianan sa lungsod maagian na apan dili ang nagusbat nga provincial road sa barangay Candabong.

Ang Candabong-Manga nga agianan dili gihapon maagian human kini giguba sa baha nga mugna sa bagyong Seniang.

Samtang sa lungsod sa Barili, laing agianan ang buhaton aron makonektar pagbalik ang agianan gikan sa barangay Bolocboc ngadto sa Nasipit.

Si Barili Mayor Teresito Mariñas nagkanayun nga delikado na ang daan nga agianan human gihugno ni Seniang mao nga kinahanglan sila maghimo og bag-o.

“This lot is unstable so we have to condemn it and look for another road,” matud ni Mariñas.

Ang kadaut ni Seniang ngadto sa inprastraktura nakahimo sab og daku’ng epekto ngadto sa transportasyon sa mga produkto.

Matud sa Provincial Agriculture Office nga posible nga mas motaas pa ang presyo sa mga utanon ug mga ani tungod sa mga gipanggusbat nga agianan sama sa Dumlog bridge sa Sibonga.

Gani iyang gibana-bana nga mikunhod og dili moubos 50 porsyento ang crop supply gikan sa habagatang Sugbo.

Hinuon, ang Department of Public Works and Highways nagsugod na sa pag-instalar sa temporaryo nga steel bridge sa Dumlog aron maagian na kini sa dili pa ang Sinulog. (BANAT NEWS)