Naunay sa gipraktisang payloader patay

CEBU, Philippines - Usa ka 48-anyos nga lalaki ang nakabsan sa iyang kinabuhi human maigo ang ulo sa bucket sa pay loader ug natabonan kini sa balas samtang giingong nagpraktis og operate niini diha sa Barangay Guiwanon, lungsod sa Argao.

Ang namatay naila nga si Sabino Pantinople, taga Barangay Taloot sa mao gihapong lungsod, drayber sa trak. Si Police Officer 3 Von Tecson, ang imbestigador sa maong aksidente nga nakahinabi sa Banat News miingon nga si Pantinople misuway pag-operate sa excavator-loader sa kompaniya nga iyang gitrabahoan nga manghimoay og hollow blocks.

Matud niya, dihang gikandos ni Pantinople ang gitapok nga balas, misalta ang lubot sa payloader tungod sa kabug-at, apan naratol kini ug milayat sa atubangan.

Apan nasangit ang lawas niini ug napiko sa ubos, dungan usab nga mi-release ang bucket nga dunay balas ug naigo ang iyang ulo ug nayab-an sa balas nga maoy hinungdan sa iyang kamatayon.  (Jean Lumapas,USJ-R Intern/EIM)(BANAT NEWS)