Mandaue daghan’g kolorum nga traysikol

CEBU, Philippines - Gihigpitan karon sa Traffic Enforcement Agency of Mandaue (TEAM) ang operasyon batok kolorum nga mga traysikol nga namasahero sa nagkadaiyang dapit sa dakbayan.

Si Edwin Ermac, executive officer sa TEAM, nipadayag nga sa 6,000 nga gidaghanon sa mga namasahero nga traysikol sa siyudad, 2,000 lang niini ang may prangkisa.

Giangkon ni Ermac nga nahimo hinuon nga dili kaayo epektibo ang ilang gihimo sa pagsumpo sa kolorum  tungod kay P500 lang ang multa. Nagtinguha sila nga mahimong deputized agent sa Land Transportation Office (LTO) ang ilang mga traffic enforcers aron temporary operator’s permit ang ilang i-isyu sa madakpan.

Makabayad og multa nga P1,500 ngadto sa P2,000 ang drayber o operator sa kolorum nga traysikol kun TOP ang luwatan sa traffic enforcer. (BANAT NEWS)