2015 budget sa Talisay laslasan

CEBU, Philippines - Ipahigayun karong adlawa ang special session sa konseho sa dakbayan sa Talisay nga gipatawag ni Bise Mayor Romeo Villarante aron pagpalabang sa P731 milyones nga annual budget nga giduso ni Mayor Johnny Delos Reyes

Dul-an sa P200 milyones ang gipaabot nga ilaslas sa oposisyon nga sakop sa konseho sa budget karong tuiga aron mahimo na lang nga kapin sa P500 milyones.

Ang intelligence fund sa mayor nga moabot og P10 milyones hatagan lang kini og P100,000.

Si Delos Reyes niduso sa P731 milyones nga annual budget karong tuiga nga mas daku sa P600 milyones sa niaging tuig.

Ang pundo sa City Social Welfare and Services nga maoy tinubdan sa mga tabang nga ihatag kun dunay moduol sa mayor nga kantidad sa P23 milyones ang laslasan sa katunga.

Ang buhatan sa anak sa mayor nga si City Administrator John Yre Delos Reyes ang hatagan lang og P2 mil sa pag-atiman sa iyang buhatan P50 mil sa iyang biyahe.

Matud ni Mayor Delos Reyes nga wala siya’y mahimo kun kini ang desisyon sa konseho apan wala niya isalikway ang posibilidad nga i–veto niya ang maong budget.

Ang majority floor leader sa konseho, Konsehal Choy Aznar, mihulagway nga base sa ilang pagtuon, igo lang ang budget nga ilang ipalabang karong tuiga.

Hinuon makaduso pa og supplemental budget ang mayor. (BANAT NEWS)