DOH nangandam na sa kalihokan sa Pista Senyor

CEBU, Philippines – Subsob na ang gihimong pagpangandam sa mga personnel sa Department of Health sa Rehiyon 7 alang sa nagkadaiyang kalihukan sa selebrasyon sa Sinulog 2015.

Kapin sa 22 ka mga medical posts ang ipahimutang sa mga strategic locations sa siyudad aron dunay kadangpan ang mga deboto nga dunay kakulian sa panglawas.

Sa pagsugod pa lang sa 9 ka adlaw nga nobenaryo sa kapistahan ni Senyor Sto. Niño, mopahimutang na og tulo ka mga medical posts ang DOH-7 sulod sa Basilica Minore del Sto. Niño, sa gawas nga bahin sa simbahan ug sa may Magellan’s Cross.

Nakig-alayon usab ang DOH sa ubang ahensya pagpahibalo sa publiko sa ilang mga medical posts.

Apan mipahimangno si DOH-7 Director Dr. Jaime Bernadas sa publiko nga magmabinantayon sa kaugalingon atol unya sa grand parade kinahanglan dili magpalabi og buwad sa init aron kalikayan ang heat stroke.

Mas maayo  usab nga magdala og kalo o raincoat aron panagang sa init ug uwan. Gidili usab ang pagpataka og kaon sa mga pagkaon sa mga street foods kay sagad sa mga naninda wa mag-agi og food handling seminar sa DOH.

Maayo usab nga magdala og kaugalingong pagkaon ug tubig ug dili maayo ang pagdutdot sa daghang mga tawo aron makalikay sa stampede.

Gipasidan-an usab ni Dr. Joanri Riveral kadtong dunay gipamati sa lawas nga di na lang mopugos pa sa pagsalmot sa nagkadaiyang kalihukan sa Sinulog. Kadtong manan-aw, kinahanglang magsuot og hayahay nga sapot ug butangan og ID ang mga bata. – /EIM) (BANAT NEWS)