P5 bilyones target ni Rama
CEBU, Philippines – Dako kaayo ang pagsalig ni Cebu City Mayor Michael Rama kang Cebu City Treasurer Diwa Cuevas nga makakolekta kini karong tuiga og P5 bilyones nga buhis dinhi sa dakbayan.
Giawhag ni Rama ang publiko ilabi na kadtong mga magpapatigayon dinhi sa dakbayan sa pagbayad g’yud sa hustong buhis.
Kinahanglan usab nga ilaha kining bayran sa tukmang oras aron dili sila makamulta ug mapatungan pa og interes. “Everyday is a deadline day,” pasabot pa sa mayor. Ang CTO nagbutang og One Stop Shop diha sa SM Trade Hall diha sa North Reclamation Area aron modawat og mga taxpayers sa siyudad.
Gipasalig sa CTO nga matapos ang transaksyon sud lang sa kinse minutos niadtong mga buot mobayad sa ilang mga business taxes diha sa One Stop Shop. Kadtong mga real property taxes adto gihapon iproseso sa City Hall. Sa iyang bahin, si Cuevas miingon nga ilang paninguhaon nga makolekta ang P5 bilyones nga target ni Mayor Rama.
Ang One Stop Shop gibuksan sugod kagahapong adlawa, modawat kini og taxpayers sugod pa lang sa alas-8 sa buntag ug mahuman sa alas-5 sa hapon.
Aron masiguro nga makakolekta og dakong buhis, ipatuman ni Rama ang “no noon break” policy aron walay putol ang pagdawat sa mga buot mobayad og buhis. Si Rama nagpasalamat kang Henry Sy ang tag-iya sa SM tungod sa pagtugot niini sa siyudad nga makagamit sa trade hall sa iyang mall. – /EIM) (BANAT NEWS)
- Latest
