Mga senior citizens di motabang sa CCMC

CEBU, Philippines – Di na ipadayon ang planong pagdonar og P116 milyones sa mga senior citizens sa dakbayan gikan sa ilang nahibiling tag P2,000 nga financial assistance sa tukoron pagbalik nga Cebu City Medical Center. Si Rolando Llaguno, kanhi pangulo sa Office of the Senior Citizens Affairs (OSCA) sa siyudad miingon nga atol sa gipahigayon nila nga regular meeting dunay mga nisuporta sa maong plano, apan ning bag-ohay lang, wala na mouyon ang kadaghanan kanila.

Ang siyudad adunay 58 mil ka rehistradong senior citizens, sa sinugdanan daghan ang mipabor niini apan ning pagsulod sa bulan sa Enero nga mao ang bulan nga gikatakdang ipanghatag ang nahibiling tag P2 mil, wala nay misanong sa maong plano.

Si Llaguno gihulipan na ni Domingo Chavez isip pangulo sa OSCA apan matud pa nga magpabilin si Llaguno isip adviser sa maong buhatan subay sa kamandoan ni Mayor Michael Rama. Si Domingo Chavez sa iyang bahin miingon nga ang opisina sa OSCA ibalhin na sa Gotiaoco Building unom (6) ka buwan gikan karon.

Dugang pa niya nga mas dali na unyang bisitahon ug kun dunay mga transaksyon o iproseso ang mga senior citizens sa maong balhinang buhatan.  Mas haruhay kini tungod kay mas lapad itandi sa kasamtangan nilang buhatan.

Lakip sa plano ni Chavez ang pagbutang og suggestion box alang sa mga senior citizen aron makahibawo siya sa mga problema niini. – /EIM) (BANAT NEWS)