Overloaded nga barko gipamulta sa Coast Guard
CEBU, Philippines – Gipamulta sa Philippine Coast Guard –Cebu Station ang Roble Shipping Lines human giingong nag-overloading atol sa pag-abot niini sa Sugbo gikan sa Leyte.
Ang giimbestigar nga barko mao ang M/V Graceful Star kansang kapitan giila sa report sa GMA News.Tv, nga si Capt. Pretchard Gayo.
Sumala pa sa report, nga nasakpan sa coast guard nga nagdala kini og 736 ka pasahero gikan sa Baybay, Leyte.
Apan ang coast guard nagkanayon nga 692 lang ka pasahero ang kapasidad sa maong barko. Matud pa nga giihap sa coast guard personnel ang mga pasaherong nanganaog ug nasakpan nilang lapas kini og 44 ka tawo. Tungod niini, ang coast guard miisyu og Enforcement Inspection Apprehension Report (EIAR) tungod sa paglapas sa Department of Transportation and Communication (DOTC) Department Order No. 2003/43.
Si PCG-Cebu district commander Rodulfo Villajuan mibutyag nga dunay gihimong adjudication hearing bahin sa kalapasan sa maong barko ug nadesisyonan nga pamultahon kini, wala hinuon ibutyag kun pila ang multa.
Matud pa ni Villajuan multa lang ang gisilot tungod kay una pa kining nahitabo sa maong kompanya ug daghan kaayong pasahero ang natanggong tungod sa bagyong Seniang nga buot makabalik sa Sugbo.
"These mitigating circumstances were being considered. We imposed a fine to served as a warning not to do it again," matud pa ni Villajuan. (Mitchelle Palaubsanon sa The Freeman ug report gikan sa GMA News.Tv/EIM) (BANAT NEWS)
- Latest
