P5 mil sa makatudlo sa naghugaw-hugaw sa Liberation Park
CEBU, Philippines - Nitanyag si Talisay City Mayor Johnny De los Reyes nga mohatag og P5,000 sa makatudlo sa nihugawhugaw sa Liberation Park sa barangay Poblacion.
Personal nga gibisita ni De los Reyes ang lugar kagahapon human nasayud sa paghugaw-hugaw ug gisuwat-suwatan pa og mga pasangil nga siya wala’y gamit nga pagka-mayor.
Hinuon wala ang maong suwat-suwat dihang gibisita sa mayor ang lugar. Wala igsapayan ni De los Reyes ang mga pasangil batok kaniya apan ang iyang gikabalak-an ang paghugaw-hugaw sa national shrine.
Ang park gideklarar sa National Historical Institute isip national shrine niadtong 2009.
Ang mga suwat-suwat anaa sa luyo sa marker nga gibutang sa NHI, 10 ka metros gikan sa mga istatuwa sa makasaysayanon nga pagdunggo sa mga Amerkano ug Pilipino nga sundawo 69 ka tuig ang nakalabay.
"Kung unsa ilang gibuhat, mo-reflect man pud na’s kaatbang kung unsa sila. Kinsa may laing manaut nako? Pero sagdi lang, ang mga tawo nalang ang mohukom," matud ni De los Reyes.
Nagtinguha si De los Reyes sa pagbutang og closed-circuit television (CCTV) camera ug gwardiya sa Liberation Park aron usab paghatag og seguridad sa mga mobisita.
Ang Liberation Park gigastohan og P5 milyones sa pagpaayo niadtong tuig 2009 samtang P1 milyon sa niaging tuig. (BANAT NEWS)
- Latest
