Mga biktima ni Seniang giduaw ni Binay
CEBU, Philippines - Giduaw ni Bise Presidente Jejomar Binay ang mga pamilya sa mga nakalas sa bagyong Seniang sa lungsod sa Ronda kagahapon.
Ang giduaw ni Binay mao ang haya sa mga pamilyang Bajenting ug Faunillan sa Barangay Liboo diin pito ka sakop sa ilang banay ang nabanlas sa baha uban sa ilang balay, samtang missing pa gihapon ang kapin dos anyos nilang anak.
Mitunol usab si Binay og salapi nga hinabang sa mga namatyan, nasayran nga katorse ka tawo ang nakalas sa maong lungsod tungod sa maong bagyo.
Misaad ang bise presidente kanila nga hatagan og housing assistance kadtong mga nawad-an og panimalay uban sa cash assistance sa mga nabiktima.
"Dagdagan pa ninyo ang inyong pananampalataya sa ating mahal na Panginoon. Hindi niya tayo pababayaan," awhag pa ni Binay sa atubangan sa mga tawong midugok kaniya.
Nangapud-apod usab si Binay sa lungsod sa Dumanjug og 1,500 ka relief goods sa mga biktima sa bagyo human sa gihimong boodle fight sa Dumanjug Public Market uban ni kanhi Cebu Governor ug karon Third District Representative Gwendolyn Garcia.
Samtang gidugok usab si Binay sa mga tawo sa pagbisita niini sa lungsod sa Sibonga diin nanghatag usab kini og relief goods ug mitambong sa misa sa patay diha sa Nuestra Señora del Pilar Church sa usa sa mga biktima sa bagyo nga padung na ilubong, gihatagan usab niyang og hinabang ang mga kabanay niini. (BANAT NEWS)
- Latest
