Motor gihugasan, gihabulan nawagtang

CEBU, Philippines -  Nahanaw ang Honda nga motorsiklo bag-o pa gihugasan ug gihabolan sa usa ka panimalay sa barangay Cansaga, lungsod sa Consolacion.

Si Police Officer 1 Jetz Miro sa Consolacion Police Station miila sa biktima nga si Baby Maglasang Gelsala, 41- anyos.

Gitug-an sa biktima nga gidala pa niya niadtong Biyernes sa buntag ang iyang motorsiklo sa dakbayan sa Sugbo alang sa pag-washing ug sa pagpauli iyang gi-parking sa tugkaran sa ilang balay.

Dugang pa ni Miro nga tungod sa tinguha sa biktima nga dili kini ma-abogan, iyang gitabonan sa tarpaulin ang motorsiklo.

Daku’ng katingala sa biktima kay nahanaw na ang motorsiklo sa iyang pagmata kagahapon sayo sa buntag.

Matud ni Miro nga niadtong tuig 2014, daghan ang biktima sa pagpangarnap og sakyanan nga naglakip sa motorsiklo ug ang pagkawagtang sa motorsiklo ni Gelsala maoy unang taho sa pagpangarnap karong tuiga.  (BANAT NEWS)