Naglutaw sa dagat

CEBU, Philippines -  Naluwas ang manag-uyoang mananagat sa lungsod sa San Remigio human sa 20 ka oras nilang paglutaw-lutaw sa dagat nga pagpatong na lang sa nalunod nilang pumpboat.

Na-missing ang duha nga silang Charlie Vince Arcabal, 22, ug uyoan nga si  Danny Plaza, 43, dihang wala na mabalik kagahapon sa buntag gikan milawod niadto pang Biyernes sa kadagatan sa Barangay Anapog, San Remigio.

Si Police Officer 3 Dante Teaño, desk officer, nga nahinabi sa Banat News miingon nga ang duha nanagat alas-2 sa hapon niadtong Enero 2 (Biyernes).

Apan kagahapon sa buntag adlaw nga Sabado wala pa gihapon sila mabalik hinungdan nga mipa-blotter na ang amahan ni Charlie Vince nga si Carlito Arcabal, sa kapolisan ug gilusad ang pagpangita kanila sa mga sakop sa Philippine Coast Guard ug Bantay Dagat.

Nianang pagkahapon kagahapon, dunay mipahibalo kanila nga ang duha naagian sa LCT Barcelona cargo ship sa Tañon Strait sa habig na sa Escalante City Negros Oriental pasado alas-10 kagahapon sa buntag.

“Hapon na na report, gidala sa pantalan sa Escalante ang duha ug gidala sila sa pantalan sa Tabuelan,” aron mauli sila sa ilang mga pamilya.

Matud pa ni Teaño nga nalunod g’yud ang pumpboat sa duha nga gidagsa usab nianang pagkahapon diha sa Barangay Molobolo sa lungsod sa Tuburan.

Dugang pa niya nga wa makaagwanta ang gamay nga pumpboat tungod sa dagkong bawod ug sa  kakusog sa hangin maong nasudlan kini og tubig.

Dako ang pasalamat sa amahan ni Charlie Vince nga si Carlito tungod kay luwas ang iyang anak sa iyang adlaw nga natawhan kagahapon.

Matud pa ni Teaño nga ang amahan ni Charlie Vince miingon nga agi og pasalamat sa adlaw niini nga natawhan, inay nga manok lang ang ihawon kagahapon, baboy nga puti ang iyang ihawon tungod sa iyang kalipay.

“Nag-birthday ang amahan karon (kagahapon) imbes manok ang ihawon baboy na lang g’yud kay daghan na man sang tawo nga naa sa ilaha kay nangumusta sa iyang anak,” matud pa ni Teaño. (BANAT NEWS)