Naagian ni Seniang ngitngit pa

CEBU, Philippines - Nagpadayun ang gihimong clearing ug restoration operation sa Cebu Electric Company (CEBECO) III sa pagbalik sa linya sa kuryente sa pipila ka barangay sa dakbayan sa Toledo.

Sa pagpakighinabi kang Virgilio Fortich, general manager sa CEBECO III, ilang gipaningkamutan nga mabalik dayun ang linya sa kuryente sa  mga lugar nga naapektuhan sa bagyong Seniang.

Daghang poste ang natumba ug punoan sa kahoy ang naluka hinungdan nga nangaputol ang linya sa kuryente sa pipila ka barangay sa dakbayan.

Dili mominos sa 10 ka barangay ang nisugat ug nagsaulog sa Bag-ong Tuig nga ngitngit ang palibot.

Giklaro sa CEBECO III nga dili gyud nila ibalik ang linya sa kuryente sa mga lugar kun dili ma-cleared aron pagseguro sa kaluwasan sa mga konsumedor.

Hinuon gipasalig ni Fortich nga mabalik na ang kuryente sa tanang barangay sa Toledo sa dili pa matapos kining semanaha.

Samtang ang Department of Social Welfare and Development (DSWD-7) nangapod-apod og dul-an sa 3,000 ka family food packs sa lungsod sa Barili ug Dumanjug nga grabeng naapektuhan sa bagyo.

Lakip sa gitabangan sa DSWD-7 ang mga nangatanggong nga mga pasahero sa Tagbilaran City Port diin nanghatag sila og 64 ka family food packs ug 32 ka habol.

Ang ahensiya gikatakdang magpadala og 50 ka karton sa mga canned goods ug biscuits sa probinsiya sa Bohol nga gipaubos sa state of calamity.

Ang central office sa DSWD nagpadala na sab og usa ka libo ka family food packs, mosketiro ug 2,000 ka malong sa Bohol nga gikarga pinaagi sa C-130 sa Philippine Air Force diin ang maong mga relief goods nagkantidad og kapin P1 milyon.

Sa talaan sa DSWD-7 disaster response operations monitoring and information center, 93 ka panimalay ang hingpit nga nagusbat ug 62 ang nakaangkon lang og ginagmay nga kadaut. Sa 93 ka panimalay, 42 sa lungsod sa Dumanjug, 10 sa Ronda, 11 sa Sibonga ug 30 sa Guidulman, Bohol. (BANAT NEWS)