Angay ipasalamat ang 2014

CEBU, Philippines - Angay ipasalamat sa katawhan ang tuig 2014 ug iampo ang bag-ong tuig sumala pa ni Cebu Archbishop Jose Palma sa iyang homiliya sa  Santos nga Misa niadtong Disyembre 31 diha sa Cebu Metropolitan Cathedral.

Gitataw ni Palma nga daghang maayong mga butang nga naangkon sa miaging tuig nga angay  ipasalamat ug daghan usab ang dili maayo nga nagkinahanglan og pag-ampo.

Matud pa niya nga sa tuig 2015 kinahanglang ipakita sa tanan ang panag-igsuonay ug paghiusa subay sa unod sa mensahe ni Pope Francis sa kalibotan.

Malaumon siya nga mamahimong mapahiubsanon kadtong mga adunahan ngadto sa mga kabus. Angay usab iampo ang mga tawong giulipon ug gigutom karong mga panahona.

Karong tuiga maoy gikonsiderar sa simbahan nga tuig alang sa mga kabus. (BANAT NEWS)