Daghang lugar nga way tubig karon—MCWD

CEBU, Philippines - Giawhag sa Metropolitan Cebu Water District ang publiko nga magpundo daan og tubig gumikan sa ipatuman nga Water Service Upgrading Work karong adlawa, Enero 3 ug walay agas sa maapektahang mga dapit. Ang interconnection work sa lungsod sa Consolacion, Liloan ug Compostela maoy trabahoon, agi’g pagpangandam sa bulk water supply gikan sa Manila Water Development Incorporated.

Ang maong trabaho molungtad og walo ka oras sugod sa alas- 8 sa buntag hangtud na sa alas- 4 sa hapon.

Gumikan sa maong proyekto maapektuhan ang mga dapit ug posibleng makasinati og low pressure hangtud na sa walay agas mao ang Compostela, Liloan, Consolacion, Mandaue, pipila ka bahin sa Mabolo, MEPZ 1, MCIAA, Mactan, Punta Engaño, MJ Cuenco, Carreta, Reclamation ug Pier area.

Niadtong adlaw’ng Huwebes, hingpit na nga gipatuman sa MCWD ang water rate adjustment nga dugang P1.60 sa matag cubic meter niadtong mokonsumo og napulo ka cubic meters matag bulan.

Nagpasabot kini nga kadtong mga konsumidor nga mogamit og 10 cubic meters sa tubig o ubos niini matag buwan, mobayad na og P15.20 inay nga P13.60.

Ang adjustment giaprubahan sa Local Water Utilities Administration (LWUA) board of trustees niadtong buwan sa Agosto sa miaging tuig. Mao pa kini ang unang usbaw sa presyo sa tubig sukad sa tuig 2006.  (BANAT NEWS)