6 ka pushers nadakpan

CEBU, Philippines – Nasikop sa mga polis ang unom ka suspetsado’ng drug pushers ug nasakmitan sila og dul-an sa P300 mil nga kantidad sa shabu atol sa buwag nga operation sa dakbayan sa Sugbo, Liloan ug Consolacion.

Apil sa unom nga nasikop mao ang giila nga “level2” ug “level 3” nga mga drug pushers nga nagbase sa dalan A. Lopez, Labangon ug sa Barangay Sawang Calero.

Ang mga sakop sa Cebu City Anti-Illegal Drugs Special Operations Task Group (CAIDSOTG) mi-operate ug midakop ni Francis Philip Nacar, 47, taga Sitio Cogon, A. Lopez Street, Labangon.

Matud ni CAIDSOTG chief Eunil Avergonzado nga pantalya lang ni Nacar ang negosyo nga pagpamalit og prenda apan nasayod na ang kapolisan sa ilegal niya nga kalihukan. Tulo ka semana nga mihimo og surveillance ang kapolisan nga misangpot gayud sa pagkasikop ni Nacar kagahapon sa wala pa moudto didto sa iyang panimalay human sa usa ka buy-bust operation.

Ang balay ni Nacar gironda ‘sab ug nakuhaan og 71 ka gagmay ug duha ka medium size nga pakete nga dunay sulod nga gituohang shabu nga mokantidad og P200 mil.

Matud pa nga si Nacar makahalin og mga usa ka kilo nga shabu matag semana. Gitanggong na sa karsel sa Cebu City Police Office (CCPO) si Nacar ug giandaman na og kaso. Samtang nadakpan usab sa mga sakop sa San Nicolas Police Station ang giingong ilado’ng drug pusher sa Barangay Sawang, Calero nga si  Richard Plando, 25, minyo.

Si Senior Inspector Chuck Barandog, hepe sa San Nicolas police, miingon nga “level 3” pusher si Plando ug dugay na ‘sab nila nga gipanid-an. Si RTC Executive Judge Soliver Peras maoy mihatag og search warrant nga nagtugot sa mga polis nga rondahon ang balay ni Plando.

Nakuha sa kapolisan sulod sa balay ni Plando ang 31 ka gagmay ug 2 ka medium size sa gituohang shabu nga mikantidad og P70,000.

Samtang laing upat ka gidudahang drug pushers nadakpan ug adto mag-bag-ong tuig sa bilanggoan. Sila nasikop sa buy-bust operation sa kapolisan kaniadto’ng Domingo sa udto didto sa Purok Dabong, Sitio Landing, Barangay Poblacion, Liloan.

Ang nadakpan mao sila si George Paradiang, 32, minyo, Glenn Talisik, 29, Ian Bastasa, 29 ug Philip Galido, 29, nga pulos nagpuyo sa sama nga dapit.

Si PO3 Jesson Gayo sa Liloan Police Station miingon nga sila si Paradiang ug Talisik maoy target nila sa buy-bust operation nga gipangulohan sa ilang hepe nga si Senior Inspector Ramil Morpos.

Dugay ra nga ang kapolisan nakadawat og report sa ilegal nila nga kalihukan sa pagpamaligya og gidili nga drugas. Matud ni PO3 Gayo nga si Paradiang maoy mitunol sa usa ka pakete’ng shabu ngadto sa ilang puseur buyer bugti sa marked money nga P200 maoy hinungdan nga dali kini nila nga gidakop.

Ang kauban ni Paradiang nga si Talisik nga diha atol sa mao nga higayon giapil nila pagdakop dayon girikisa ug nakuhaan og lima ka pakete’ng shabu.

Ang laing dinakpan nga si Bastasa nakuhaan usab og mga drug paraphernalia samtang si Galido nakuhaan usab og pito ka pakete nga shabu. Gituohan nga padulong unta magsuyop og shabu ang mga dinakpan.

Ang upat ka mga dinakpan gibalhug karon sa bilanggoan ug kaso nga pagpamaligya ug paghupot og ilegal nga drugas nga giandam na aron ipasaka batok kanila. – /RUB) (BANAT NEWS)