Nibadlong sa away sa magtiayun gidunggab

CEBU, Philippines – Grabeng naangol ang 35-anyos nga lalaki nga gidunggab sa iyang bayaw sa sitio Bohol-Bohol, Looc, dakbayan sa Mandaue ala una pasado sa niaging kadlawon.

Ang biktima mao si Danhil Arquilla Wong, minyo ug ang nagdunggab mao si Ramil Degamo Torreon, 28-anyos, bana sa igsuo’ng babaye sa biktima nga lumad nga taga San Jose, Getafe, Bohol ug kasamtangan nga nagpuyo sa maong dapit.

Si Police Officer 3 Bryan Beringuer miingon nga gikalalis sa suspek ang iyang asawa nga manghud sa biktima kinsa nibadlong dihang nagkagrabe na ang panaglalis sa magtiayun.

Nasuko ang bana ug nikuha og kutsilyo ug gihansakan ang biktima sa makadaghang higayun sa iyang bukobuko.

Gidala ang biktima sa tambalanan samtang ang suspek nadakpan sa kapolisan ug gikatakdang pasakaan og kaso’ng frustrated murder unya pa sa Enero 5. – /GMR) (BANAT NEWS)