58-anyos nanghinol og 8-anyos

CEBU, Philippines – Gitanggong ang usa ka 58-anyos nga lalaki sa Toledo City Police Station human gipasanginlan nga nanghinol sa otso anyos nga babaye sa barangay Sagay.

Giila ang dinakpan nga si Carmelito Fernandez, 58, taga barangay Tanibag, lungsod sa Pinamungajan apan lumad nga taga lungsod sa Argao.

Matud ni Kapitan Jimbo Luza sa barangay Sagay nga ang inahan sa 8-anyos nga bata ang nangayo og tabang human nireklamo nga gihinol ang pribadong parti sa lawas sa bata sa suspek.

Dugang asoy ni Luza nga naghilak ang bata nga nisumbong sa iyang inahan.

Nitug-an sab ang igsuon nga 10-anyos nga batang lalaki nga iyang nakit-an ang suspek nga nagsabak sa iyang manghud.

Daling niresponde ang kapitan kuyog ang duha ka barangay tanod aron pagkompirmar sa sumbong.

Hinuon naabtan sa kapitan ug sa tanod ang gireklamo ug ila kini’ng giimbestigar kalabot sa pasangil.

Matud ni Luza nga niangkon ang suspek nga iyang gihikap ang pribadong parti sa lawas sa bata apan mihimakak nga iyang gihilabtan.

Gisikop sa kapitan ug barangay tanod ang suspek ug gidala sa Toledo City Police Station.

Gikatakda nga ipahiling ang bata sa tambalanan aron sa pagsusi kun wala ba gyud mahilabti ang kinatawo niini. – /GMR) (BANAT NEWS)