P63M target sa CSBT sa 2014
CEBU, Philippines - Ang tagdumala sa Cebu South Bus Terminal (CSBT) nagtuo nga molapas ang ilang kita karong tuiga sa kota nga gipangayo sa Kapitolyo.
Ilang target ang P63 milyones nga koleksiyon sa pagtapos niining tuiga.
Matud sa operations manager sa CSBT, Eddie Dusaban, nga gikotahan sila og P61 milyones sa Kapitolyo alang sa tuig 2014. Apan kompiyansa na si Dusaban nga molapas pa sa maong kota ang ilang makolekta.
Sa buwan sa Enero hangtud na sa Nobiyembre, miabot na sa P57.6 milyones ang kita sa CSBT.
Matud ni Dusaban nga mas maayo ang ilang koleksiyon karong tuiga itandi sa niaging tuig.
Wala’y nakita’ng problema si Dusaban nga maguba ang dagan sa operasyon sa CSBT sanglit gihatagan nila og pagtagad ang ilang koleksiyon ug mas daghan ang ilang mga tenants karong tuiga nga naglakip sa food court ug mga pasalubong centers. (BANAT NEWS)
- Latest
