Karaang boarding house naugdaw
CEBU, Philippines - Mokabat P150 mil ang gibiling danyos sa sunog nga miigo sa usa ka karaang building nga gihimong boarding house sa may dalan Magallanes ug P. Burgos sa Barangay Sto. Niño sa dakbayan sa Sugbo kagahapon sa buntag.
Ang maong building gipanag-iya ni Nick Limkonhoy ug ang tenant niini naila nga si Rachel Echavez.
Si Senior Fire Officer 2 Tristan Tadatada, arson investigator nga nahinabi sa Banat News miingon nga nadawat nila ang alarma sa alas 6:35 sa buntag.
Matud pa ni SFO2 Tadatada nga sa ilang pag-abot sa building nikatap na gikan sa ground floor ngadto sa ikaduha nga andana ang kayo.
Nakontrolar hinuon kini dayon sulod sa lima ka minutos apan gihulagway ni Tadatada nga totally damaged g’yud ang maong building.
Base sa imbestigasyon gikan sa pamahayag sa mga lalaking nagpuyo sa silong sa maong building, duna silay nabantayang mibuto sa ubos ug mikuyanap dayon ang kalayo.
Si Christel Tarsinde, 20, usa sa mga nag-abang sa maong building miingon nga nahinanok pa siya sa pagkatulog dihang miulbo ang sunog sa silong.
Sumala pa niya nga dako na kaayo ang kalayo ug grabi na ang aso dihang nakamata siya hinungdan nga siya ug ang iyang kauban sa kwarto nga duha ka mabdos daling nanganaog.
Wa g’yud sila’y napupho sa ilang mga gamit tungod sa kakalit sa hitabo gawas na lang sa ilang tapot-lawas ug sa halin sa ilang tinda.
Ubay-ubay ang miresponde nga mga bombero sa maong lugar lakip na sa kapitan sa Barangay Sto. Niño nga si Pancho Ramirez ug sa iyang mga kagawad ug kapolisan. (BANAT NEWS)
- Latest
