Greyhound sa CCJ mga kutsilyo nasakmit
CEBU, Philippines – Pipila ka mga kontrabando nasakmit sulod sa Cebu City Jail atol sa gipahigayon nga operation greyhound sa Bureau of Jail Management and Penology (BJMP) ug 35 personnel sa Cebu City Police Office (CCPO) kagahapon sa kaadlawon.
Matud ni Jail Superintendent Johnson Calub, OIC sa BJMP, nakasakmit sila og 25 ka improvised nga kutsilyo, 19 ka pisi, 14 ka lighters, 20 nga lansang unom ka depektosong cellphones ug uban pa. Gibuhat ang maong operasyon aron pagpakita nga dili mahitabo sa mga prisohan sa Central Visayas ang nahitabo sa New Bilibid Prison ubos sa Bureau of Corrections nga adunay air-conditioned kubol-kubol sa mga pinalabing priso.
Dili lang kini mao ang himoan og susamang operasyon sa mosunod nga mga adlaw.
Kung ang ubang prisohan gitugot ang party ug dalaw karong Pasko ug Bag-ong Tuig, way ingon niining kalihokan sa CCJ.
Si Bise Mayor Edgardo Labella nagkanayon nga bisan sa nahitabo, dako gihapon siya og pagsalig kang Calub ug gitambagan kining likayan ang paghatag og pabor-pabor sa mga inmates. – /EIM) (BANAT NEWS)
- Latest
