Napatay sa polis

CEBU, Philippines – Patay ang usa ka lalaki human nga misukol sa mga sakop sa Regional Public Safety Battalion (RPSB) 7 atol sa ilang pagsilbi sa warrant of arrert sa kasong murder diha sa barangay Balud, San Fernando.

Ang napusilan mao si Jerry Sanoy,  taga Negros Oriental kinsa gisuwayan pa pagdala sa Cebu Provincial Hospital sa dakbayan sa Carcar apan patay na kini.

Matud pa ni Senior Police Officer 1 Rolando Bastida, desk officer sa San Fernando Police, ang mga sakop sa RPSB-7 nga gipangulohan ni Inspector Alvino Enguito  miadto sa barangay Balud aron pagsilbi og warrant of arrest batok sa usa ka Ronjohn Labrador.

Ang warrant of arrest sa kasong murder gi-isyu ni Judge Alexander Acosta apan dihang nagkaduol na ang tropa dunay duha ka tawong dali nga nanggawas sa balay nga naila nga sila si Labrador ug Sanoy.

Sumala pa ni Insp. Alvino Enguito, sila maoy unang gipamusil sa duha ug swerte lang nga walay naigo sa mga polis, apan sa ilang pagbawos nakadagan na si Labrador.

Sa ilang pagduol sa gitagoan sa duha, wala na si Labrador ug nahagba na si Sanoy nga may samad pinusilan sa likod ug sa paa.

Narekober sa RPSB-7 ang usa ka kalibre .45 nga pistola, usa ka magazine nga duna’y duha ka mga bala.

Hangtod karon nagpadayon pa ang gihimong pagpangita sa RPSB-7 ngadto na sa pugante nga si Labrador. – /EIM) (BANAT NEWS)