Terminal giandam na
CEBU, Philippines - Ang kagamhanan sa probinsiya sa Sugbo nangandam sa Cebu South Bus Terminal alang sa kasaulugan sa Pasko ug Bag-ong Tuig.
Si Jone Siegfred Sepe, officer-in-charge (OIC) sa Provincial General Services Office (GSO), nagkanayon nga sa milabay’ng semana nagbutang sila og mga tents sa terminal nga mapasilongan sa mga pasahero.
Hinuon sumala pa ni Sepe nga dili sama sa Kalag-kalag ang bul-og sa mga pasahero tungod kay mubo lang ang adlaw sa pagsaulog.
Ang Pasko ug Bag-ong Tuig taas ang bakasyon hinungdan dili usab magdungan-dungan ang mga pasahero.
Gilauman nga sa Disyembre 24 ug 31 ang posibleng magdungan-dungan ang gidaghanon sa pasahero tungod kay ang uban sa maong mga petsa mao pa usab ang ilang bakasyon gikan sa trabaho apan “manageable” lang kini.
Gipaabot nga karong adlawa modagsa na ang mga pasahero nga mopauli sa ilang mga probinsiya.
Si Gob. Hilario Davide III nagkanayon nga kung gikinahanglan magdugang sila og mga Suroy-Suroy bus ug posibleng mopahatag sila og mga special permit. (Brenda D. Batuto/GMR)(BANAT NEWS)
- Latest
