1 patay, 2 angol sa pag-ambush

CEBU, Philippines - Patay ang usa ka drayber og “habal-habal” ug samdan ang duha niya ka pasahero diha’ng gibanhigan sila ug gipauwanan og mga bala sa wala mailhi’ng mga tawo kaniadto’ng Biyernes sa gabii didto sa Barangay Poblacion, dakbayan sa Toledo.

Ang namatay giila nga si Joel Danlag, 26, taga Barangay Tubod, Toledo City, samtang ang mga angol mao sila si Gil Pialago, 48, ug Teodoro Purisima Jr., 35, pulos taga Sitio Lawis, Barangay Luray II.

Base sa imbestigasyon sa kapolisan nahibaw-an nga sila si Purisima ug Pialago misakay og motorsiklo nga gimaneho ni Danlag. Samtang ang habal-habal nagdagan didto sa Diosdado Macapagal Highway sa Poblacion, Toledo kalit lang may mitapad kanila nga motor. Ang tawo nga nag-angkas sa pikas motor mikalit lang sa pagpamusil kanila sa makadaghan nga higayon. Human sa pagpamusil ug diha nga nakita nila nga natumba na ang motorsiklo, misibat ang mga namusil. Ang mga biktima nakaangkon og grabe’ng samad sa lawas hinungdan nga gidala dayon sila sa Toledo City Hospital, apan si Danlag gideklarar nga patay na. Ang duha ka samaran giatiman pa sa mga doktor. Tungod sa grabe nga kadaot nga naangkon ni Pialago, nahukman sa mga doktor nga balhinon siya sa tambalanan dinhi sa dakbayan sa Sugbo aron maatiman pag-ayo ang iyang kahimtang.

Nakarekober ang mga polis og lima ka kabhang sa 45 kalibre nga pistola gikan sa nahitaboan sa pagpamanhig.

Wala na maapsi sa mga polis kadto’ng mga tawo nga kalit lang mipusil sa mga biktima. Wa pa ‘sab matino kun unsa ang motibo sa maong pagbanhig sa tulo ka biktima. (Bryner Diaz/RUB)(BANAT NEWS)