P13B lang sa P18B budget ang giaprubahan

CEBU, Philippines -  Giaprubahan na sa konseho sa siyudad sa Sugbo ang P13.4 bilyones nga 2015 annual budget kagahapong adlawa.

Kuwang kini og kapin P5 bilyones sa giduso untang budget nga P18.9 bilyones sa mayor human nakita sa konseho nga daw di gyud makab-ot sa budget ang gipangayo.

Nakita sa konseho nga igo ra g’yud ang income sa siyudad  aron mahatag ang di mominos sa P13.4 bilyones.

Kini sama na lang sa P4.5 bilyones gikan sa halin unya sa SRP lot, sa ilang sources of funds usab diin ang tax revenues nga mokabat lang og P2.98 bilyones, non- tax revenues nga mokabat lang sa P770 milyones, external sources nga P1.5 bilyon.

Samtang makakolekta lang og P490 milyones ang siyudad gikan sa binuwang lot amortization sa SM ug FILINVEST,  sa auction sale of real properties mokabat sa P50 milyones ug ang domestic borrowings  nga P3.1 bilyones.

Gikwestyon ‘sab sa mga konsehal atol sa budget hearing ang paggamit sa P4.5 bilyones nga fund source sa dakbayan.

Samtang mipahimangno usab si Bise Mayor Edgardo Labella sa konseho nga mag-amping sa ilang gipanglitok nga mga provisions tungod kay adunay mga posibilidad nga mapasakaan sila og kaso sama na lang sa nahitabo sa calamity assistance nga gipangapod apod sa mga city hall employees.

“It is my respectful submission that the council is encroaching on the powers of the mayor it violates the provision of the law. Some mischievous lawyer and crackpots may file harassment case I don’t want to happen again,” matud pa ni Labella.

Samtang si Mayor Michael Rama sa iyang bahin, miingon nga maayo na lang ni nga dunay gihatag nga budget nungka sa wala. (BANAT NEWS)