Amahan ug anak sikop sa anti-drug operation

CEBU, Philippines - Nadakpan ang amahan ug anak, laing usa ka pusher sa managlahing buy-bust operations sa kapolisan sa probinsya sa Sugbo.

Sa lungsod sa Compostela, nadakpan ang manag-amahang Vanhalen Nebria, 27, ug amahan niining si Manuel,49, pulos molupyo sa Sitio Hika, Barangay Poblacion. Nadakpan si Vanhalen sa buy-bust human napalitan og shabu ni Police Officer 2 Daryl Rondina. Samtang nadakpan ang amahan niini nga si Manuel pinasikad sa search warrant  dihang nakuhaan kini og  tulo ka paketeng shabu ug drug paraphernalia. Ang maong search warrant giluwatan ni RTC-7 Branch 65 Executive Judge Teresita Abarquez-Galanida, sa dakbayan sa Mandaue. Sa laing bahin, nadakpan ‘sab sa buy-bust operation ang usa ka lalaki nga tigbaligya ug tigpayuhot og shabu sa Barangay Putat, lungsod sa Tuburan. Ang suspek mao si Eran Armas Bascar alyas "Hernan", 36, residente sa maong dapit kinsa nadakpan sa mga sakop sa Municipal Anti-Illegal Drugs Special Operation Task Group sa Tuburan Police Station nga gipanguluhan ni Senior Inspector William Ceda Homoc, acting chief of police sa maong lungsod. Nakuha gikan sa suspek ang upat ka paketeng gituohang shabu, mga drug paraphernalia, ang buy-bust money, ug  kwarta nga gituohang halin gikan sa ilegal nga mga buhat. (Romeo Limpangog ug Sharmaine Kaye F. Obra, USJ-R Intern/EIM)(BANAT NEWS)