Nabalda nga proyektong field oval sa Naga ipadayon

CEBU, Philippines - Magpadayon na ang proyekto nga track and field oval sa siyudad sa Naga human gi-dismiss sa Court of Appeals and Writ of Kalikasan nga  gisang-at sa mga environmentalists nga supak sa maong proyekto tungod kay dunay mga kahoy gipamutol.

Kini maoy gibutyag ni Department of Environment and Natural Resources Secretary Ramon Paje atol sa iyang pagbisita sa Sugbo  niadtong adlaw’ng Huwebes. Una niini, ang Court of  Appeals gi-dismiss ang petisyon nga Temporary Environmental Protection Order (TEPO) sa rason nga dili kini maoy sulbad sa maong problema.

Matud ni Secretary Paje nga ang track and field oval gi-isyuhan sa ilang ahensiya og special cutting permit nga gi-endorsar sa ilang central office.

Kahinumduman, nga misang-at og petisyon ang PTCA President sa Naga Central School Winley Dela Fuente ug Macaraig Canton nga maoy representante sa civic group nga Movement for Livable Cebu.

Base sa nauyonan, 79 g’yud unta ka mga kahoy ang putlon apan 58 lang ang naputol kini naglakip sa mahogany, agoho, narra,ug lomboy.

Tumong sa maong pagpamutol sa kahoy aron kahatagan og katumanan ang planong pagtukod og dugang classrooms lakip na ang track and field oval sa kagamhanan sa siyudad sa Naga.

Niadtong Nobiyembre 21 ang lokal nga kagamhanan sa Naga nananom og kapin sa dos mil ka mga kahoy sa barangay Inayagan isip hulip sa 58 ka kahoy nga gipamutol.

Kini maoy kondisyon nga gihatag sa DENR-7 diin ang usa ka kahoy nga putlon kinahanglan hulipan og 50 ka liso sa kahoy. (Decemay P. Padilla/EIM)(BANAT NEWS)