PRO7 motabang pangita sa HPG cops
CEBU, Philippines - Andam moabag ang Police Regional Office-7 sa ipahigayon nga “manhunt operation” sa National Bureau of Investigation (NBI) ngadto na sa tulo ka mga sakop sa Highway Patrol Group-7 nga akusado sa pagbanhig patay ni Atty. Noel Archival niadtong bulan sa Pebrero niining tuiga didto sa lungsod sa Dalaguete.
Si Chief Superintendent Prudencio Tom Bañas, direktor sa kapulisan sa Central Visayas nagkanayon nga molusad og manhunt operation batok nila ni Senior Superintendent Romualdo Iglesia, Senior Inspector Joselito Lerion ug PO1 Alex Bacani nga gituohang wala sa Campo Crame human nalutsan og warrant of arrest.
Si Bañas miingon, kung masigpatan ang tulo dinhi sa Central Visayas dakpon sila diretso. Matud pa ni Bañas nga dili na bag-o kanila nga dakpon ang ilang mga kaubang polis.
Gipanawagan ‘sab ni Bañas ngadto sa tulo nga motahan ug motahod sa proseso tungod kay dili makatabang sa ilang kaso ang pagtagotago.
Mismo ang tigpamaba sa HPG sa Camp Crame nga si Supt. Elizabeth Velasquez mikompirmar nga wala na sa Personnel Holding Administrative Section (PHAS) sa HPG ang tulo ug ilaha na kini karong gipangita.
Ang igsuon ni Archival nga si barangay Talamban kagawad Nelson Archival, miingon nga mopaprinta sila og mga hulagway sa tarpaulins ug promotional materials sa tulo ka polis aron ibutang sa mga police stations, barangay halls ug publikong lugar.
Giawhag usab niya ang kadagkoan sa PNP nga ipakita ang tulo aron di sila mapasanginlang nidapig sa maong mga polis, tungod kay kung dili, mopasaka sila og kaso sa PNP. (Jojo Ugdol ug Grace Lacamiento/EIM)(BANAT NEWS)
- Latest
