Umagad gidunggab sa ugangan

CEBU, Philippines - Maayong pagkatuhab sa tiyan sa 24-anyos nga lalaki human gidunggab sa iyang ugangan sa barangay Tubod, dakbayan sa Toledo.

Giila ang samdan nga si Jhonrey Linihan samtang ang suspek mao si Feliciano Stayta, 60, parehong nagpuyo sa nahisgutang lugar.

Base sa imbestigasyon sa kapolisan sa Toledo nga nagkalingaw pa nga nag-inom og ilimnong makahubog ang duha sa ilang panimalay.

Human nga nagkalami sa ilang panag-inom kalit nga nagkalalis ang duha ug nagbinayloay og hait nga pulong hinungdan nga nasuko si Jhonrey.

Daling mipunit si Jhonrey og botelya sa ilimnon nga wala’y sulod dayun’g hapak sa ulo sa iyang ugangan nga si Feliciano kinsa  dali sab nakakuha og kutsilyo kusina ug gihansak sa tiyan sa iyang umagad. Gidala ang duha sa Toledo City Hospital apan gibalhin si Jhonrey sa tambalanan sa dakbayan sa Sugbo tungod sa grabeng samad nga nahiaguman. Gikustodiya na sa kapolisan si Feliciano ug  gitakdang pasakaan og kaso. (BANAT NEWS)