Manhunt vs 3 Polis

CEBU, Philippines - Gikompirmar ni Superintendent Elizabeth Velasquez, tigpamaba sa Philippine National Police (PNP) Highway Patrol Group sa Camp Crame nga wala na sa ilahang kostudiya karon ang kanhi HPG-7 officials nga suspek pagpatay kang Atty. Noel Archival.

Matud pa niya nga dihang iyang gisubay ilang records, wala na sa Personnel Holding Administrative Section (PHAS) sa HPG ang tulo sukad pa niadtong Biyernes.

Wa hinuon siya masayod kun nahatdan og warrant sila si Senior Superintendent Romualdo Iglesia, Senior Inspector Joselito Lerion, ug PO1 Alex Bacani.

Matud pa ni Velasquez nga gipakatap na nila karon ang ilang tracker teams aron pangitaon ang tulo hasta sa ilang mga address apan wala pa sila makit-i.

“Wala na sila sa amin and hindi pa sila nakikita,” matud pa niya sa The Freeman. Matud niya, kun di gihapon sila mopakita, ideklarar silang absent without leave (AWOL). Gikompirmar hinuon niya nga sugod niadtong gi-relive ang tulo sa HPG7 ug gibalhin dinhi, nakostudiya g’yud sila sa PHAS. Sa laing bahin, milusad na og manhunt operation ang National Bureau of Investigation-7 batok sa tulo, sumala pa ni NBI Regional Director Max Salvador .

Niadtong Disyembre 12, gi- serve sa NBI central office ang warrant of arrest  sa tulo apan wala sila sa maong buhatan.

Sumala pa ni Salvador nga kun ilahang makit-an ang mga akusado gawas sa maong kampo ila silang dakpon. Si Cebu City Konsehal Nestor Archival, igsuon sa biktima, nanawagan sa mga akusado sa pagtahan ngadto ni Judge Maximo Perez sa Regional Trial Court Branch 26 nga maoy mi- issue sa warrant niadtong Disyembre 11. Ang prosecutions lawyers nga sila si Democrito Barcenas, Gloria Lastimosa-Dalawampu ug Rameses Villagonzalo nagkanayon nga way kapuslanan ang pagpagawas sa warrant of arrest kun di madakpan ang tulo.

Iyang gipasabot nga walay kapuslanan ang pagtago sa tulo gikan sa balaod tungod kay matawag na silang pugante. Mibahad si Barcenas nga kun magdumili pagtahan ang kapolisan sa tulo ug mahibaw-an nga gituyo nilang tagoan ang tulo, mopasaka sila og kasong Obstruction of Justice ug kakunsabo sa krimen,  batok sa kadagkoan sa PNP.

Ang abogado sa usa sa mga akusadong si Lerion nga si Atty. Inocencio dela Cerna nagkanayon nga siguroon pud nila nga maprotektahan ang interes ug katungod sa iyang kliyente ug mo-file sila og mga legal remedies niini.

Sila si Iglesia, Lerion ug Bacani maoy gitumbok nga mi-ambush kang Archival, iyang driver nga si Alejandro Jayme, bodyguard niyang si Candido Miñoza, ug on-call assistant nga si Paolo Cortes niadtong Pebrero 18, 2014 sa Barangay Coro, Dalaguete. Si Cortes lang ang nakalingkawas sa kamatayon. (BANAT NEWS)