P.50 pagminus sa plete sa PUJ

CEBU, Philippines - Kasamtangang minusan og 50 sentabos ang minimum nga pletehan sa mga public utility jeepneys (PUJ) samtang magpaabot sa hingpit nga desisyon sa Land Transportation Franchising and Regulatory Board.

Kini human gika-uyonan atol sa public hearing kagahapon ang pagpaminus og 50 sentabos sa minimum nga pletehan ubos sa kondisyon nga ipatuman kini sa labing daling panahon.

Uyon ang transport sector sa 50 sentabos nga fare rollback apan ang consumer group niduso og P1 nga pag-ubos sa pletehan.

Si LTFRB-7 acting Director Reynaldo Elnar miingon nga ilang i-finalize ang tanang pamahayag sa transport ug consumer groups ug iduso sa uluhang buhatan.

Samtang magpaabot sa resolusyon, ipatuman ang provisional reduction nga 50 sentabos.

Ang 50 sentabos nga provisional fare reduction gibase sa LTFRB sa petisyon nga giduso ni kanhi konsehal Augustus Pe Jr.  Gipasalig hinuon sa ahensiya nga sa dili pa matapos karong buwana ma-implementar na ang provisional fare rollback nga maoy gipangayo sa mga sumasakay human usab mikunhod ang presyo sa mga produktong petrolyo. (BANAT NEWS)