Tag P3 mil ang madawat sa mga seniors karong Lunes

CEBU, Philippines - Mga senior citizens dinhi sa dakbayan sa Sugbo nga rehistrado sa Office of the Senior Citizens Affairs (OSCA) panghatagan og laing P3 mil karong Lunes.

Apan ang P300 milyones nga gigahin unta alang sa pagtukod og bag-ong Cebu City Medical Center (CCMC) building maoy kuhaan aron makahatag ang dakbayan og dugang cash assistance sa mga senior.

Si Konsehal Margarita “Margot” Osmeña ug ang ubang konsehal sa dakbayan sa Sugbo misukit-sukit pag-ayo ni City Treasurer Diwa Cuevas kun ngano nga ang kuwarta man alang sa CCMC ang gamiton sa pagpanghatag og cash assistance sa mga senior citizens. 

Gipasabot ni Cuevas nga ang mao nga kantidad dili pa dayon kinahanglanon sa pagka karon mao nga gamiton kini ug ilisan ra unya karong buwan sa Enero.

Nahibulong si Konsehal Osmeña kun ngano nga wala may magamit nga kuwarta ang dakbayan sa pagpanghatag og cash assistance sa mga senior citizens nga ang City Council mipagahin man og P720 milyones alang karong tuiga.

Nakasaway si Konsehal Osmeña sa gihimo’ng lakang ni Mayor Michael Rama kay ang mao nga kantidad orihinal g’yud nga gitagana sa paglimpyo sa daplin sa Mahiga Creek apan gibalhin sa mayor alang sa pagtukod og bag-ong ospital. Nagtuo si Konsehal Osmeña nga bisan og gigahinan nila og budget ang mga senior citizens nga makadawat og tag P12 mil apan kay pakyas si Mayor Rama sa pagkolekta sa kantidad mogamit kini sa lain nga budget. (BANAT NEWS)