Gitulis sa kanhi silingan
CEBU, Philippines - Kursonada nga nitulis sa usa ka balay ang upat ka tulisan nga wala nagtaptap sa ilang nawong sa sitio Palare, barangay Mindanao, Malabuyoc sayo sa buntag kagahapon.
Ang biktima nga si Antonio Alloso, 44, minyo, nakaila sa usa sa mga tulisan nga si Alberto Telebanco nga iya kanhi silingan ug karon sa lungsod sa Barili na nagpuyo.
Matud ni SPO2 Edward Villarte, desk officer sa Malabuyoc Police Station, nga pasado alas 5 sa buntag kalit lang nibutho ang upat ka tulisan nga sakay sa duha ka motorsiklo ug dali nga nisulod sa balay ni Alloso dayun ti-on sa armas ug deklarar og tulis.
Nakuha sa mga tulisan ang kuwarta nga P120,000; duha ka relo nga kantidad P6 mil ang matag usa ug usa ka kwentas nga kantidad og P5 mil.
“Kursonada kaayo kay wala man gyud sila nagtaptap, si Telebanco mao’y nag-guide sa iyang mga kauban suhito sa lugar kay silingan man sila sa una,” sigun pa ni Villarte.
Human sa pagpanulis dali nga nisibat ang mga tulisan paingon sa wala masayri nga direksiyon.
Si Telebanco giingong may kaso na sa pagpanulis ug napriso na sa Barili sa susamang kaso. (BANAT NEWS)
- Latest
