‘Police car’ gilungkab

CEBU, Philippines - Gilungkab ang sakyanan sa polis nga sakop sa Theft and Robbery Section sa Cebu City Police Office nga giparada sa CITI Parking Services, Luzon Avenue, Ayala Business Park alas 7 pasado sa nakalabay nga gabii.

Lakip sa nakuha sa sakyanan ni PO1 Reynaldo Romano Jr. ang iyang service firearm nga 9mm Glock 17 pistol gikan sa glove compartment sa sakyanan.

Nasuta sa ocular investigation sa kapolisan ug Crime Scene Investigation nga gibuak sa kawatan ang bildo sa tuong bahin sa Mitsubishi Pajero nga sakyanan sa biktima.

Padayon pa nga gipangita  ang responsable sa hitabo kinsa gituohang local boys lang ang mihimo niini.

Ang parking area wala’y close circuit television (CCTV) camera, ug wala’y guwardiya gawas sa usa ka tawo nga tigkolekta sa parking fee.

“Dili man gyud to sa Ayala, private parking ra man gud to, mao to’ng wala’y CCTV ug guwardiya sa taga Ayala,” matud ni Chief Insp. David Señor, hepe sa TRS.

Gisusi na sa kapolisan ang mga lugar nga sagad baligyaan sa mga kinawat nga butang sa Duljo, Pasil ug Ermita apan negatibo.

Posibleng gitagoan pa una sa kawatan ang kinawat nga armas.

Samtang ang hepe sa Investigation and Detection Management Branch (IDMB), Chief Insp. Aileen Recla, nagkanayon  nga ila pa nga gipaabot ang report gikan sa TRS aron ilang masayran ang tinuoray nga hitabo.

Gipasabot ni Recla nga hayan makabayad si Romano sa kantidad sa armas nga nawala kung dili kini makit-an.

Dili ra mag-atubang og kasong administratiba kung masuta nga dili tinuyo ang pagkawala sa armas.

“Patubagon lang namo siya og tarung, dili man gud ka makadala og armas sa sulod sa Metro, klaruhon lang ang imbestigasyon kay bahala og makabayad sa armas basta wala ra’y kasong admin,” matud ni Señor. (BANAT NEWS)