Maanyag nga menor way ikapiyansa sa kaso

CEBU, Philippines – Mohangyo sa korte ang kampo sa gwapa nga menor de edad nga gikasohan og estafa nga paubsan ang piyansa alang sa kasong estafa nga giatubang niini alang sa temporaryo niining kagawasan. Ang maong batan-on gikasohan tungod sa wala niini pagbayad sa pag-istar niini sa usa ka beach resort sa Asturias sud sa tulo ka adlaw. Matud sa abogado niini nga si Atty. Rene Abcede Jr., duna nay girekomendar sa ilaha nga piyansa nga mokabat og 40 mil pesos apan sa pagkakaron nagproblema pa kun asa mokuha sa maong kantidad ang menor.

Si Abcede nagkanayon nga nagplano sila nga mosang-at og Motion for Reduction of Bail gikan sa P40 mil,  himuon kining P20 mil tungod sa “financial incapability” sa menor de edad.

Ang maong batan-on kasamtangang gikostudiya sa DSWD. Gihulagway ni Abcede nga ang nahitabo sa resort sa lungsod sa Asturias usa lang ka ‘misunderstanding’ base sa gibutyag kaniya sa iyang kliyente. Ang hepe sa Provincial Social Welfare and Development (PSWD) nga si Rose Jao mibutyag nga gibati og kabalaka ang menor nga di na siya  dawaton sa publiko.

Niadtong Lunes ang menor gipaubos kini sa psychological intervention ug giingong mihangyo kini kaniya nga tabangan sa tanang interbyu.

Ang PSWD naghuwat nga dunay moabot nga paryente ug abogado sa menor. Matud pa ni Jao nga base sa ilang obserbasyon nga maghilak tungod kay nagsagol ang gihunahuna niini ug emosyon. Matud niya, kinahanglan sa maong dalagita ang giya karong mga panahona ug kun makapiyansa kini, kinahanglang adunay moamuma niini. – /EIM) (BANAT NEWS)